左丁山:林奕華梁祝恨嫁

14 Jul 2014

左丁山/GG細語|蘋果日報副刊專欄

 

飯局上坐在林奕華旁邊,左丁山死性不改,第一次見面,開口便問他是那一間大學畢業的?以前未見過佢,但在報章上睇佢寫嘅文化評論、電視電影評論,知此君肚裏大把墨水,讀書不少,想來係喺大學讀文學院出身之人啦。點知林奕華答:「我冇資格讀大學,我係女校男生,喺玫瑰崗讀文科,會考之後就入咗無綫電視做編劇㗎嘞!」左丁山為之愕然,中學畢業生有此文化修養,必然係苦學自學成功之人,值得尊重尊敬,公關大姐大喝住左丁山話:「林奕華係天才嚟㗎,佢十五歲嘅時候已經寫作做TVB兼職編劇嘞。」

 

左丁山有此一問,亦因為自己認識好多位新亞書院1990年嘅新聞系畢業生,例如區家麟、區麗雅、汪凡、羅玉萍、吳貴亨、江岸綠、林一紅、程美寶、胡美寶、劉礎元、李志華等等。1990新聞系畢業生有一位就係叫做林奕華,與天才編劇林奕華同名同姓。

 

林奕華今年一月曾在葵青劇院推出舞台劇「恨嫁家族」,五月推出音樂劇「梁祝的繼承者們」,皆叫好叫座,不少劇評大讚。為咗滿足心願要在香港文化地標──尖沙嘴文化中心上演佢嘅傑作,不惜冒極大財政風險,用盡私己儲蓄,再向朋友借錢,再度製作呢兩套劇,7月18至7月20日先演出四場「梁祝的繼承者們」,梁祝只是借名義一用,實情是描述藝術學院學生對自己與未來的憧憬和想像,十場景致盡在學院,主題為「我是誰」及「甚麼是藝術」,有18首歌,全由林奕華填詞,編舞由曾在香港及法國拿取編舞獎的伍宇烈。

 

舞台劇「恨嫁家族」則在7月25日至7月27日公演四場,由黃詠詩編劇,今次重演特邀曾獲香港舞台劇最佳男主角獎(喜劇/鬧劇類)的梁祖堯參與演出,劇情描述現代女性對嫁、恨嫁、嫁了又恨,「我恨故我嫁」,「我嫁故我恨」的複雜萬分的情緒與理性的搏鬥。同林奕華傾偈,幾分鐘後就發現大家係不同時代人物,左丁山睇劇,仍停留「說故事一代」,林奕華就係21世紀講意識、性格、身份嘅3D立體一代,充滿新文化活力魅力!香港有林奕華呢類人,邊個敢話香港創意工業不能起飛呀!

Please reload

​相關文章
Please reload

最近動態

【非常林奕華 X 西九文化區】節目巡禮

9 Jul 2019

《近看林奕華-非常林奕華舞台映畫》首次在台放映

14 May 2019

比聊齋更聊齋的《聊齋》,六月回來了

18 Feb 2019

梁祝的繼承者們》(三度公演)門票退款安排

24 Sep 2018

1/13
Please reload